Немојте да гласате за Мила! Ама стварно!!!

Не баш будно ги следев случувањата околу овие избори, ама од денеска нешто ете се посветив малку повеќе. Сега нема да навлегувам во комуникацијата на главните “играчи”, т.е. кандидати за претседател и градоначалник на Скопје. Ама една кампања баш ми падна во очи, така што не можев, а да не ја прокоментирам – кампањата на Мила Искреновиќ, независен кандидат за градоначалник на општина Карпош.

Мила е архитект, кој онака оптимистички како и повеќето кандидати , сака (и верува дека може) да ја оправи општина Карпош. Таа не е партиски кандидат, и ги разбира проблемите во општината. И да се потпревме само на нејзината позадина и предлог–програма, можеби и ќе имаше за што да се размисли. Но сепак има неколку работи кои навистина ме збунуваат околу нејзината кампања. Еве вака:

1. “Драги сограѓани, веќе 15 години барам начин како да ги отстранам овие дамки…” (и се покажува бело платно на кое е испишано: Корупција, мито, партиски избор). И си викам –добро, има некоја поента, дај да видам понатаму….решението било – детергент Мила, независен градоначалник за општина Карпош. Симпатична реклама, во секој случај.

И одам јас на mila.mk да видам што тоа Мила предвидела во својата програма за борба против митото и корупцијата. И гледам дека нема ништо такво! Нејзината програма е базирана на три работи: Нашите домови, Нашите основни училишта, Екологија. Зборовите “мито” и “корупција” се споменуваат само еднаш, и тоа во воведот кон програмата: “Крајно време е да прогледаме и дадеме шанса на еден вистински лидер,организатор и реализатор, хуман, доблесен, општествено реализиран и имун на ифекцијата под термин мито и корупција.” Одговор на прашањето “како?” не е даден никаде.

Во тој случај, комуникацијата во ТВ рекламата е во најмала рака погрешна, да не речам – лажна.

2. Сигурно низ Скопје сте ги забележале билбордите со слоган “Немојте да гласате за Мила!!!”. Ај што е сосема неразбирливо зошто некој ја советувал Мила да направи паралелна анти-кампања, со што не само што ги збунува гласачите, туку исти такви веќе имаше и кога се кандидираше за изборите во 2005 година! Е сега, кога тогаш не победила, зошто повторно е избрана истата тактика и комуникациска стратегија, која еднаш веќе се покажала како неуспешна?

3. Ај програмата ОК, дури и би имала некоја шанса. Арно ама, видете и ја советничката листа: носител на листата е Ранко Буба Мара, а на листата се и Мики Црнокрак кој ќе направел улиците во Карпош да бидат како модни писти, Викса-Фикса на просторот каде што се протега велосипедската патека на Партизанска би монтирал движечка лента која ќе ги пренесува луѓето до град,… итн. Е како да ја сфатам сериозно? Со вакви предлози, ме потсеќа на оној пат кога Раде Рогожаров се кандидираше за градоначалник на Штип…

Да се разбереме, Мила е баш симпатична, не е партиски кандидат, ги разбира проблемите во општината, и можеби би имала шанса на овие избори. Арно ама со малце од малце попаметна комуникациска тактика за избориве. Ваква “духовитост” не е баш на место… А зошто е тоа така?

“Ова е нашата кампања, следуваат уште поинтересни и повпечатливи билборди”, изјавил Ранко Буба Мара, носител на советничката листа за Карпош и брат на Мила. “Мила воопшто не знае каква кампања и подготвуваме. Јас сум тој кој е одговорен за билбордите и претставувањето.“

Е баш живо ме интересира што ново и “креативно” ќе смисли овој искусен и надарен адвертајзер како следна фаза на кампањата за Мила! А ти драга Мила, следниот пат ангажирај си професионалци.